മാഞ്ചസ്റ്റര്‍ സിറ്റിയെ പ്രീമിയര്‍ ലീഗില്‍ നിന്ന് വിലക്കുമോ? കുരുക്കായി സാമ്പത്തിക ക്രമക്കേട് ആരോപണം; പരാതിയില്‍ കഴമ്പില്ലെന്ന് സിറ്റി മാനേജ്‌മെന്റ്

മാഞ്ചസ്റ്റര്‍: വിജയങ്ങള്‍ക്ക് പിന്നാലെ വിജയങ്ങളുമായി ഇംഗ്ലീഷ് പ്രീമിയര്‍ ലീഗ് രാജാക്കന്മാരായി മാറിയ മാഞ്ചസ്റ്റര്‍ സിറ്റി എഫ്‌സിയെ ഇപ്പോള്‍ പിടിച്ചു കുലുക്കിയിരിക്കുന്നത് സാമ്പത്തിക ക്രമക്കേടുകളും അതേ തുടര്‍ന്നുള്ള അന്വേഷണവുമാണ്. യൂറോപ്പിലെ പ്രമുഖ ടൂര്‍ണമെന്റായ ഇംഗ്ലീഷ് പ്രീമിയര്‍ ലീഗിന്റെ സാമ്പത്തിക ചട്ടങ്ങള്‍ ലംഘിച്ചുവെന്ന് കാണിച്ച് 115 കുറ്റങ്ങളാണ് സിറ്റിക്കെതിരെ ചുമത്തിയിട്ടുള്ളത്.

ഇക്കഴിഞ്ഞ തിങ്കളാഴ്ച മുതല്‍ കേസില്‍ വാദം കേള്‍ക്കല്‍ തുടങ്ങിയിട്ടുണ്ട്. വാദപ്രതിവാദങ്ങള്‍ ചുരുങ്ങിയത് രണ്ടര മാസം നീണ്ടുനില്‍ക്കുമെന്നാണ് വിവരം. ലണ്ടനിലെ അന്താരാഷ്ട്ര തര്‍ക്ക പരിഹാര കേന്ദ്രത്തില്‍ മാധ്യമങ്ങളെയും മറ്റും വിലക്കി തീര്‍ത്തും സ്വകാര്യമായാണ് വാദം കേള്‍ക്കല്‍.

2008 ല്‍ ക്ലബ്ബിനെ അബുദാബി രാജകുടുംബം വാങ്ങിയതിന് ശേഷം 2009 മുതല്‍ 2018 വരെയുള്ള കാലയളവില്‍ ഒമ്പത് വര്‍ഷത്തിനിടെ സാമ്പത്തിക കാര്യങ്ങള്‍ സംബന്ധിച്ച് ക്ലബ് അധികൃതര്‍ തെറ്റിദ്ധരിപ്പിക്കുന്ന വിവരങ്ങള്‍ നല്‍കിയെന്നാണ് പ്രീമിയര്‍ ലീഗ് അധികൃതര്‍ ഉയര്‍ത്തിയ പരാതി. കഴിഞ്ഞ വര്‍ഷം ഫെബ്രുവരിയിലാണ് ടൂര്‍ണമെന്റ് അധികൃതര്‍ ഇക്കാര്യം ചൂണ്ടിക്കാട്ടി പരാതി നല്‍കിയത്.

ലീഗിന്റെ ഫിനാന്‍ഷ്യല്‍ ഫെയര്‍ പ്ലേ നിയമങ്ങള്‍ അനുസരിച്ച് ഓരോ ക്ലബ്ബുകളും അവര്‍ സമ്പാദിക്കുന്നത് അത്യാവശ്യമായി ചെലവഴിക്കുകയും വാണിജ്യ ഇടപാടുകള്‍ നിയമാനുസൃതമായ മാര്‍ക്കറ്റ് മൂല്യത്തിലാണെന്ന് ഉറപ്പാക്കുകയും ചെയ്യണം. എന്നാല്‍ ഇവയടക്കം നിരവധി കാര്യങ്ങളില്‍ മാഞ്ചസ്റ്റര്‍ സിറ്റി വീഴ്ച്ച വരുത്തിയിട്ടുണ്ടെന്നാണ് പ്രീമിയര്‍ ലീഗ് അധികാരികള്‍ ആരോപിച്ചിരിക്കുന്നത്.

ക്ലബ്ബിന്റെ ഇ-മെയിലുകളും രേഖകളും ഹാക്ക് ചെയ്തതിന് ശേഷമാണ് സിറ്റിക്കെതിരെ കുറ്റം ചുമത്തിയത്. വരുമാന സ്രോതസ് മറച്ചുവെക്കാനുള്ള ശ്രമങ്ങള്‍ രേഖകളില്‍ തെളിഞ്ഞതായി ടൂര്‍ണമെന്റ് അധികാരികള്‍ ആരോപിച്ചിരുന്നു.

2008 ല്‍ അബുദാബി യുണൈറ്റഡ് ഗ്രൂപ്പ് ഏറ്റെടുത്തതിന് ശേഷം ചാമ്പ്യന്‍സ് ലീഗ് അടക്കം എട്ട് പ്രധാന കിരീടങ്ങള്‍ മാഞ്ചസ്റ്റര്‍ സിറ്റി നേടിയിട്ടുണ്ട്. ലോകത്തിലെ ഒന്നാംനമ്പര്‍ താരങ്ങളെ ക്ലബ്ബിലെത്തിക്കുന്നതിനും സിറ്റി മുന്‍നിരയിലാണ്.

അതേസമയം പ്രീമിയര്‍ ലീഗ് അധികാരികള്‍ ക്ലബ്ബിനെതിരെ ഉന്നയിച്ചിട്ടുള്ള പരാതിയില്‍ കഴമ്പില്ലെന്നും സാമ്പത്തിക ഫെയര്‍ പ്ലേ ചട്ടങ്ങള്‍ ലംഘിച്ചിട്ടില്ലെന്നുമാണ് സിറ്റിയുടെ വാദം. കുറ്റം തെളിയിക്കാനായാല്‍ പ്രീമിയര്‍ ലീഗ്, യുവേഫ ചാമ്പ്യന്‍സ് ട്രോഫി തുടങ്ങിയ വന്‍കിട ടൂര്‍ണമെന്റുകളിലേക്കുള്ള പ്രവേശനം വിലക്കാനാണ് സാധ്യത.