ജയിക്കാന്‍ താത്പര്യമുണ്ടായിരുന്നേല്‍ പാലക്കാട് ശോഭയെയോ സുരേന്ദ്രനെയോ മത്സരിപ്പിക്കണമായിരുന്നു; കൃഷ്ണകുമാര്‍ തോറ്റാല്‍ കുറ്റം തന്റെ തലയില്‍ കെട്ടിവെക്കാന്‍ ശ്രമമെന്നും സന്ദീപ് വാര്യര്‍

പാലക്കാട്: പാലക്കാട് ജയിക്കാന്‍ താല്‍പര്യമുണ്ടായിരുന്നേല്‍ ശോഭാ സുരേന്ദ്രനെയോ സംസ്ഥാന അധ്യക്ഷന്‍ കെ.സുരേന്ദ്രനെയോ മത്സരിപ്പിക്കേണ്ടതായിരുന്നുവെന്ന് ബി.ജെ.പി സംസ്ഥാന സമിതിയംഗം സന്ദീപ് വാര്യര്‍. പാലക്കാട് കൃഷ്ണകുമാര്‍ തോറ്റാല്‍ അതിന്റെ ഉത്തരവാദിത്വം തന്റെ തലയില്‍ കെട്ടിവെക്കാനാണ് ശ്രമം നടക്കുന്നതെന്നും പാലക്കാട് മാധ്യമങ്ങളോട് സംസാരിക്കവേ സന്ദീപ് പ്രതികരിച്ചു.


താന്‍ ഉന്നയിച്ച പ്രശ്നങ്ങള്‍ക്ക് പാര്‍ട്ടി നേതൃത്വം പരിഹാരം കാണാത്തത് മനഃപൂര്‍വമാണെന്ന് സംശയിക്കേണ്ടിയിരിക്കുന്നു. സ്ഥിരമായി തോല്‍ക്കുന്ന ഒരു സ്ഥാനാര്‍ഥിയാണ് കൃഷ്ണകുമാര്‍. ബി.ജെ.പിക്ക് ജയിച്ചുകയറാന്‍ കഴിയുന്ന പ്രധാന മണ്ഡലങ്ങളിലൊന്നാണ് പാലക്കാട്. പക്ഷെ, അത് കുറെക്കൂടെ അനായാസകരമാക്കാന്‍ മറ്റ് സ്ഥാനാര്‍ഥികള്‍ക്ക് കഴിയുമായിരുന്നുവെന്നും സന്ദീപ് പറഞ്ഞു.

കാര്യങ്ങള്‍ മനസിലാക്കി സന്ദീപ് തിരിച്ചുവരണമെന്നും തിരഞ്ഞെടുപ്പ് പ്രചാരണങ്ങളില്‍ സജീവമാകണമെന്നുമാണ് നേരത്തെ കെ.സുരേന്ദ്രന്‍ വാര്‍ത്താസമ്മേളനത്തില്‍ പറഞ്ഞത്. അത് സൂചിപ്പിക്കുന്നത് താന്‍ കാര്യങ്ങള്‍ മനസിലാക്കാത്ത ആളാണെന്നും താന്‍ ഉന്നയിച്ചതൊന്നും പ്രശ്നമേ അല്ലെന്നുമാണ്. പ്രശ്നങ്ങള്‍ പരിഹരിക്കണമെങ്കില്‍ ആദ്യം പ്രശ്നങ്ങളുണ്ടെന്ന് അംഗീകരിക്കണമെന്നും അതിനു തയാറല്ലെങ്കില്‍ ആത്മാഭിമാനം പണയംവച്ച് തിരികെ വരില്ലെന്നും സന്ദീപ് പറഞ്ഞു.