ലാഭവിഹിതം നല്‍കാമെന്ന് പറഞ്ഞു വഞ്ചിച്ചു...ആര്‍.ഡി.എക്‌സിന്റെ നിര്‍മ്മാതാക്കള്‍ക്കെതിരെ കേസ്

കൊച്ചി: ആയോധന കലയില്‍ പ്രാവണ്യം നേടിയ യുവാക്കളുടെ കഥപറയുന്ന കഴിഞ്ഞ ഓണച്ചിത്രം ആര്‍.ഡി.എക്‌സിന്റെ നിര്‍മ്മാതാക്കള്‍ക്കെതിരെ കേസ്. വഞ്ചന, ഗൂഢാലോചന എന്നീ കുറ്റങ്ങള്‍ ചുമത്തി നിര്‍മ്മാതാക്കളായ സോഫിയ പോള്‍, ജെയിംസ് പോള്‍ എന്നിവര്‍ക്കെതിരെയാണ് കേസ് എടുത്തിരിക്കുന്നത്. തൃപ്പൂണിത്തുറ മജിസ്ട്രേറ്റ് കോടതിയുടെ നിര്‍ദേശ പ്രകാരം തൃപ്പൂണിത്തുറ പോലിസിന്റേതാണ് നടപടി.

തൃപ്പൂണിത്തുറ സ്വദേശി അഞ്ജന അബ്രഹാം ആണ് കേസ് നല്‍കിയത്. സിനിമ നിര്‍മാണത്തിനായി ആറ് കോടി നല്‍കിയ തനിക്ക് 30 ശതമാനം ലാഭവിഹിതം നല്‍ക്കാമെന്ന ഉറപ്പ് പാലിച്ചില്ലെന്നാണ് പരാതി.

നഹാസ് ഹിദായത്ത് സംവിധാനം ചെയ്ത് വീക്കെന്‍ഡ് ബ്ലോക്ക്ബസ്റ്റേഴ്‌സിന് കീഴില്‍ സോഫിയ പോള്‍ നിര്‍മ്മിച്ച ചിത്രമാണ് ആര്‍.ഡി.എക്‌സ്.  ഷെയ്ന്‍ നിഗം, ആന്റണി വര്‍ഗീസ്, നീരജ് മാധവ് എന്നിവര്‍ക്കൊപ്പം ബാബു ആന്റണി, ലാല്‍, മഹിമ നമ്പ്യാര്‍, ഐമ റോസ്മി സെബാസ്റ്റ്യന്‍, മാലാ പാര്‍വതി, ബൈജു സന്തോഷ് എന്നിവരാണ് ചിത്രത്തില്‍ അഭിനയിച്ചത്.

2023 ഓഗസ്റ്റ് 25ന് ഓണക്കാലത്താണ് ചിത്രം റിലീസ് ചെയ്തതത്. ലോകമെമ്പാടും 84 കോടിയും കേരളത്തില്‍ നിന്ന് 50 കോടിയും ചിത്രം കളക്ഷന്‍ നേടിയിരുന്നു. ഈ ഓണത്തിന് ഇതേ പ്രൊഡക്ഷന്‍ ഹൗസ് ഒരുക്കുന്ന കൊണ്ടല്‍ എന്ന ചിത്രം റിലീസ് ചെയ്യാനിരിക്കെയാണ് കേസ് വന്നിരിക്കുന്നത്.