സമാധാന ശ്രമങ്ങള്‍ നടക്കുന്നതിനിടെ ഗാസയില്‍ വീണ്ടും ഡ്രോണ്‍ ആക്രമണം; 17 പേര്‍ കൊല്ലപ്പെട്ടു

ജറുസലം: ഗാസയില്‍ സമാധാന ശ്രമങ്ങള്‍ നടക്കുന്നതിനിടെ ഇസ്രയേലിന്റെ ടാങ്ക്, ഡ്രോണ്‍ ആക്രമണം. മധ്യഗാസയിലെ ദെയ്ര്‍ അല്‍-ബലാഹിലും തെക്കന്‍ ഗാസയിലെ ഖാന്‍ യൂനിസിലുമാണ് ആക്രമണമുണ്ടായത്. 17 പേര്‍ കൊല്ലപ്പെട്ടു.

ഗാസയില്‍ വെടിനിര്‍ത്തലിനായി മധ്യസ്ഥത വഹിക്കുന്ന ഈജിപ്ത്, ഖത്തര്‍ രാജ്യങ്ങളുടെ പ്രതിനിധികളുമായി യുഎസ് സ്റ്റേറ്റ് സെക്രട്ടറി ആന്റണി ബ്ലിങ്കന്‍ ചര്‍ച്ച നടത്തിയതിനു പിന്നാലെയാണ് ആക്രമണം.

ഗാസയിലെ ഇസ്രയേല്‍ ആക്രമണത്തില്‍ 40,223 പേരാണ് ഇതുവരെ കൊല്ലപ്പെട്ടത്. ആക്രമണത്തില്‍ കൊല്ലപ്പെട്ടവരിലധികവും സാധാരണക്കാരാണ്. ഇസ്രയേലിന്റെ ആക്രമണത്തില്‍ ഗാസയില്‍ നിന്ന് നിലവില്‍ 23 ലക്ഷം ജനങ്ങള്‍ പലായനം ചെയ്തിട്ടുണ്ടെന്നാണ് റിപ്പോര്‍ട്ടുകള്‍.